Април годинава беше еден од најтоплите во последните 30 години. Се карактеризираше како многу топол месец со нормална врнежливост, максималната температура од 30,7 степени беше измерена во Гевгелија, информираат од УХМР.
Средномесечната температура изнесувала од 7,9°С во Лазарополе до 16,6°С во Гевгелија. Споредено со просечните априлски средномесечни температури, за триесетгодишен период (1991-2020), овогодинешната била 2,5 °С над просекот на ниво на држава.
„Највисоката максимална температура беше измерена на 14 април во Гевгелија и изнесуваше 30,7 °С. На територијата на државата во текот на месецот, од 5 до 16 ти беше забележен продор на топлотен бран. Забележена е појава на слаб мраз на повисоките места од 18-ти до 22-ри во месецот. Најниската минимална температура во текот на месецот беше измерена во Лазарополе, на 20 април и изнесуваше -3,1 °С“, велат од УХМР.
Во месец април минатата година, месечната сума на врнежи во државата изнесувала од 26 mm во Демир Капија до 80 mm во Маврово.
„Врнежите беа од дожд и снег. Максимално дневно количество на врнежи од дожд 26 мм беше регистрирано во Берово на 18-ти, додека максимална снежна покривка од 9 см беше измерена во Попова Шапка на 21-ви во месецот“, нагласуваат од УХМР.
Споредено со априлската просечна вредност за многугодишен период (1991-2020), додаваат од Управата, измерената месечна сума на врнежи била околу просекот, на ниво на држава.