Струмичката Епархија при МПЦ-ОА ги информира сите заинтересирани крстени православни и полнолетни граѓани на возраст од 18 до 33 години од Струмица, кои сакаат да земат учество во чинот на полагањето на крстот во водите на градски базен „Аквариус“ во Струмица, најдоцна до 18-ти јануари да се пријават во просториите на Црквата „Свети Кирил и Методиј” во Струмица.
На 19-ти јануари – Богојавление во 12:00 часот Светиот крст ќе биде спуштен во осветените води на градски базент „Аквариус“.
Од Струмичкат аепархија велат: Божјата благодат и силата на Светиот Дух со кој се осветува водата, особено се чувствува на денот на Просвештението, кога правиме спомен на Крштението Господово од раката на Св. Јован Претеча.
Со чинот на осветувањето на богојавленската вода и полагањето на крстот во водите, се символизира ослободувањето од гревот што Христос му го донесе на родот човечки.
Во тој миг се случува осветување на сите води и секој што ќе се допре или пие од таа осветена и облагодатена вода, го чувствува Божјиот благослов, се исполнува со голема сила и му се дава духовно и телесно здравје, но само доколку со вистински страв Божји и побожност пристапува кон оваа голема тајна.
Затоа е многу важно учесниците во чинот на полагањето на крстот во водата претходно да учествуваат и на Божествената Литургија со примање на Светата причест.
Всушност самиот овој чин не треба да биде сфатен како еден обичен ритуал, ниту некаква натпреварувачка игра на којашто целта е само да се фати крстот, туку учесниците после Литургијата треба со литија да се упатат кон местото каде што ќе се осветуваат водите, и тука со најголема почит и внимание да ги слушаат прекрасните молитви на водосветот, без непристојно однесување и викање, бидејќи така си го отфрлаат благословот.
Оној, пак, кој ќе се удостои да го извлече крстот што се допира до водите и ги осветува, и да му го врати на свештеникот, треба претходно да го целива со вера, да им даде и на другите околу себе да го целиваат за и тие да бидат благословени. Потоа да го однесе благословот и во својот дом кај своите ближни, зашто крстот треба да им стане она што ќе ги обединува сите во взаемна љубов и силна вера во Христа – стои во апелот од Струмичката Православна Епархија по повод традиционалното одбележување на Водици.