Почна второто полугодие за учениците.
Основците и средношколците денеска се враќаат на настава по тринеделниот зимски распуст, за да го продолжат второто полугодие од учебната 2020-2021 година, пред ИТ-уредите или во училишните клупи.
Министерството за образование и наука смета дека комбинираниот модел на настава бил успешно воспоставен во првото полугодие и затоа нема да се менува во вториот дел од учебната година.
МОН оценува дека првото полугодие било успешн, откако наставата течела според планот, оценувањето било навремено завршено, додека над 90 отсто ученици во онлајн наставата и помалку од еден процент наставници и ученици во наставата со физичко присуство биле активни на ковид-19.
Првото полугодие оваа учебна година почна еден месец подоцна, односно на 1 октомври, а бројот на наставни денови е намален од 180 на 159, согласно со измените на Календарот за организација на работата на основните и средните училишта.
Претседателот на Сојузот на средношколци, Бленди Ходаи, претходно најави дека мнозинството матуранти од денеска ќе ја бојкотираат наставата.
Наставата во второто полугодие продолжува со истите мерки и препораки како и досега. И во второто полугодие наставата во основните и средните училишта продолжува да се одвива онлајн со исклучок на учениците од прво до трето одделение кои посетуваат настава со физичко присуство во училница, согласно капацитетите на училиштата за спроведување на планот и протоколите на Министерството за образование и наука и со одобрување од родителите.
„Ја следиме епидемиолошката состојба и доколку следните месеци се покаже стабилизирање ќе донесеме други одлуки, но тоа ќе се случи откако ќе бидеме сигурни дека трендовите со намалување на новозаразени со ковид ќе продолжат“, рече Филипче.