Уште едни избори ќе бидат катастрофални и губење на историско време, изјави бугарскиот премиер Кирил Петков.
– Видовме дека има храбри и одговорни луѓе и сега мора да се следи нивниот пример. Се фокусиравме да имаме 121 пратеник кои нема да се зависни, да нема кој да ја спречи промената во антикорупциската комисија, да нема кој да го запре буџетот. Радостин Василев и пратениците порачаа дека нивната лојалност е кон Бугарија. Сега прашање е да се следи нивниот пример со уште седум лица – рече Петков, откако неколкумина од „Има таков народ“, на чело со министерот за спорт во оставка Радостин Василев, објавија дека ја напуштаат пратеничката група.
Тој беше дециден дека нема заткулисни договори и изрази уверување дека „Промената продолжува“ ќе се сретне со други поддржувачи.
– Продолжуваме да разговараме со многу луѓе, идејата е секој да ја сфати огромната одговорност што ја носи. Ако немаме 22 предлог-закони до крајот на годината, губиме и ќе запреме 12 милијарди европски фондови, нема да дојде до ажурирање на пензиите, младите семејства нема да добиваат дополнителни даночни олеснувања, цените на горивата ќе продолжат да растат и веројатно уште еден бран на ковид-19 доаѓа наесен – коментира премиерот што ќе се случи доколку Собранието не го усвои ажурирањето на буџетот и се покренат нови предвремени избори.