Генералното собрание на Сојузот на средношколци на својата вонредна седница одржана вчеравечер го прифати компромисот понуден од страна на Министерството за образование и наука околу државната матура. Сојузот на средношколци, МОН и останатите надлежни институции постигнаа договор.
Државната матура ќе биде прилагодена на состојбата во образованието и ќе биде олесната за оваа генерација матуранти, која беше најмногу афектирана од прекините на наставниот процес. Три од четирите барања на Сојузот беа прифатени.
На матурантите ќе им се олесни полагањето на државната матура бидејќи ќе се обезбедат банки со прашања за интерните испити и овие испити ќе носат повеќе поени при уписот на факултет. Понатаму, ќе се намали бројот на прашања и бодови на првиот екстерен испит, а тој ќе се смета за соодветен на сите студиски програми, што значи додатни 2 поени при уписот.
Како ќе се полагаат испитите?
Сегашниот сооднос екстерните испити да носат најмногу 24 поени, а интерните најмногу 12 поени ќе се смени во сооднос екстерните да носат најмногу 20 поени, односно интерните најмногу 16 поени. Министерството за образование и наука преку Владата ќе им издаде препорака на универзитетите да извршат ваква промена во конкурсите.
Првиот екстерен испит ќе се смета за соодветен на сите студиски програми што значи дека оценката од овој испит ќе се множи со повисок коефициент. Конректно, матурантите ќе добијат додатни 2 поени при упис поради оваа промена, а државата ќе покаже грижа за важноста на мајчиниот јазик и литература.
Сојузот на средношколци успеа да издејствува наставниците да ги споделат банките со прашања за интерните испити најдоцна 4 недели пред испитот. Овие банки ќе содржат број на прашања 3 пати поголем од бројот на прашања на испитот. Ова е значајно олеснување за матурантите бидејќи тие ќе имаат доволно време соодветно да се подготват и за интерните испити.
Генералното собрание по долга дискусија ја прифати алтернативната понуда на МОН наместо одложување на датумот на првиот екстерен испит, да се намали обемноста на испитот. Истиот ќе носи од 60 до 80 бодови, наместо досегашните од 80 до 100, што значи дека ќе има намалување на бројот на прашања.
Оттука Сојузот на средношколци информира дека успешно постигнавме договор за државната матура. Сојузот ќе продолжи да ги застапува средношколците со уште поголема мотивација преку предлагање на квалитетни политики базирани на факти, кои се донесуваат на легитимен и демократски начин по пат на отворен и искрен дијалог во интерес на сите средношколци.