Видеа од забавите во дискотеката Аватар во Струмица ги преплавија социјалните мрежи. На кусите видео снимки се гледаат стотици присутни лица без маски, еден до друг, а ги забавуваат македонски пејачи. Граѓаните се револтирани и реагираат затоа што клубовите се преполни среде пандемија, особено вчера кога имаше 241 новозаразени со корона – вирусот.
Сопственикот на клубот Аватар, во телефонски разговор изјави дека досега се почитувале протоколите, а синоќа ситуацијата излегла од контрола. Тој смета дека ова е хајка против клубот, бидејќи, како што рече, ниту една кафетерија во Струмица не ги почитувала мерките за заштита од корона – вирусот, а во некои локали се одржувале и други големи веселби како свадби. Вели дека овој објект е регистиран како кафуле, а зимската дискотека е ноќен бар и била друга фирма.
Пазарниот инспекторат информира дека извршиле контрола во петокот и ја прекинале забавата, а за клубот е поднесена пријава. Од инспекторатот потенцираа дека клубовите не смеат да работат и од вечерва ќе се затвораат сите коишто ќе се затекнат отворени.
Освен во Струмица инспекторатот имал пријава и за клуб во Виница, каде што по инспекцијата е прекината забавата, а при инспекција на клуб во Прилеп, додека стигнале инспекторите, клубот бил затворен.
Полицијата не одговори дали биле во контрола на клубовите и кафетериите, вклучително и на клубот Аватар и дали и колку казни за непочитување на мерките се изречени.
