Концесионерите на главните грчки автопати најавија значително зголемување на патарините кои ќе стапат на сила од следниот месец, што предизвика остра реакција од грчкото Министерство за инфраструктура и транспорт, објавија грчките медиуми.
Во соопштението на министерството, цитирано од АНА-МПА, се вели дека треба да се најде реално решение без да се оптоваруваат граѓаните во 2023 година и се нагласува дека државата ќе ги исцрпи сите опции што и се на располагање за да ги запре едностраните дејствија на компаниите.
Притоа се потсетува дека на 3 јули концесионерите побарале средба во министерството за да се разговара за ажурирање на патарините врз основа на концесиските договори. Одржани се две средби, на 18 и 24 јули, на кои се разговарало за алтернативни сценарија за изнаоѓање решение кое нема да биде товар за граѓаните. Поради тоа, министерството биле изненадено кога на 28 јули пристигнал допис во кој концесионерите се изјасниле дека имаат намера да продолжат со значително зголемување на патарините.
Сајтот newmoney.gr прецизира дека во барањето на концесионерите поскапувањето на некои наплатни пунктови достигнува 16 проценти. Новите цени ќе важат само за периодот септември-декември, бидејќи следниот месец треба да се утврдат надоместоците што треба да се наплатат од почетокот на 2024 година, повторно според индексот на потрошувачките цени.