Припадници на Министерството за внатрешни работи по насоки на јавен обвинител од Основното јавно обвинителство вчера извршиле претрес на Клиниката за онкологија и на уште две локации во приватни станови во Скопје.
Предистражната постапка на Обвинителството следи по серијата написи на неделникот „Фокус“ и „Слободен печат“ кои објавија дека онколошката терапија наменета за пациенти се препродавала на црниот пазар.
Министерот за здравство д-р Фатмир Меџити изрази силна поддршка за акцијата на Обвинителството и полицијата на Клиниката за Онкологија.
– Како министер силно ги осудувам сите обиди или дејствија, на поединци или групи кои преку дискрециони овластувања и начини на носење на одлуки во сопствена корист, направиле ненадоместива штета врз здравјето и животот на пациентите, граѓаните и државата. Очекувам институциите да се произнесат брзо по однос на истрагата, кажа Меџити.