Услови за избори на 5 јуни нема, а доколку се случат тие ќе бидат целосно нелегитимни, рече Билјана Бејкова од НВО Инфоцентар. Таа смета дека релевантен попис на населението и ажурен избирачки список во кој граѓаните имаат доверба се клучните предуслови за фер, слободни и демократски избори. Затоа во партнерство со Македонскиот центар за европско образование, Осми септември и Центарот за развој на медиуми, тие денес организираа дебата на тема „Каков избирачки список и попис и се потребни на Македонија„.
На Македонија и е потребен попис кој повеќе од 10 години не е спроведен, а исто така треба да има и чист, кредибилен избирачки список, смета и Дончо Герасимовски- статистичар и поранешен директор на Државниот завод за статистика.
Настанот е реализиран во рамки на проектот „Демографија-квалитет на живеење„, кој е поддржан од проект на УСАИД за граѓанско општество, кој го спроведува Фондацијата Отворено општество Македонија.
