Низ фотографии и тажни, сочувствителни пораки вчера се прошири веста за прераната и неочекувана смрт на познатиот виолинист и професор, Зоран Џорлев. Новата година почна со простување од еден од најзначајните современи музичари во Македонија, човекот којшто со години беше препознатлив и како стамен чувар на македонскиот народен мелос. Зоран Џорлев имаше 53 години, а според првичните информации, починал како последица на компликации од корона – вирусот.
Зоран Џорлев е роден на 10 јануари во Струмица. Детството го поминал во Струмица, живеејќи на улицата „Пере Тошев” во близина на киното, заедно со братот Ристо (Ице) и сестрата Софче. Тој бил дете на Наско и Грозда Џорлеви, а татко му бил познат композитор на народна музика и водач на оркестар.
Кога бил првооделенец, со семејството се преселил во Скопје. Уште во раното детство, во Струмица, започнал да свири на труба, хармоника и гитара. Во 1977 година почнал да свири на виолина, откако претходно во музичкото училиште бил одреден да свири на пијано, зашто „немал предиспозиции за виолина”.
Во 1989 дипломирал виолина на Факултетот за музичка уметност. Познат бил по обработките и изведувањето на македонските народни и забавни композиции, обработки на филмски, џез, етно теми. Работел како професор по виолина, и бил директор на ДМБУЦ Илија Николовски Луј во Скопје. Во јануари 2011 бил назначен за директор на ансамблот за народни игри и песни „Танец”, каде останал до август 2017 година.
Веста за неговата смрт ја објави на Фејсбук неговиот внук Огнен Здравковски.