„На небото на 21 декември 2020 година, на зимската краткоденица, ќе се случи блиска средба со планетарни пропорции која не се случила од 1623 година. Имено, на 21 декември ќе се случи ретка многу блиска конјункција на Јупитер и Сатурн, а таа вечер Јупитер и Сатурн навидум ќе бидат на небото во скоро иста точка, одвоени една од друга со само 0,1 ° (1/10 степен), т.е. само 6 лучни минути “..
Што е конјункција?
Терминот “конјункција” потекнува од латинскиот збор coniunctio – врска, и значи распоред на две небесни тела кога, гледани од Земјата, ќе се приближат една до друга на најмало растојание, во овој случај станува збор за Јупитер и Сатурн.
Дали Јупитер и Сатурн навистина ќе се доближат една до друга?
Јупитер и Сатурн во реалноста нема да бидат воопшто блиски, туку милиони километри оддалечени, но од наша перспектива, гледајќи од Земјата, тие ќе се усогласат и навидум ќе се приближат на небото една до друга.
Колку се чести конјункциите на Јупитер и Сатурн?
Јупитер и Сатурн навидум се приближуваат на небото кога се гледаат од Земјата на секои 19,85 години, имајќи предвид дека на Јупитер му требаат 11,86 години, а на Сатурн 29,4 години да заокружи околу Сонцето, а потоа овој феномен на нивно блиско поминување на небото го нарекуваме конјункција.
Последната голема конјункција се случила на 28 мај 2000 година, но било практично невозможно да се види затоа што во тоа време Јупитер и Сатурн на небото биле многу близу до правецот на Сонцето, па сончевата светлина го оневозможувала набљудувањето на феноменот.
Колку е ретка конјункција како оваа во 2020?
Ваквото блиско приближување на Јупитер и Сатурн е многу ретко и можеме слободно да кажеме дека некои генерации никогаш нема да го доживеат тоа. Како што веќе рековме, последниот ваков спој се случил во 1623 година и тогаш никој не можел да го види овој феномен бидејќи Јупитер и Сатурн биле премногу блиску до правецот на Сонцето.
Последниот ваков близок спој, кој бил лесно видлив, се случил на 4 март 1226 година. Грубо кажано, овој голем спој се повторува на околу 800 години.
Каде и кога да се погледне конјункцијата?
Сонцето заоѓа на 21 декември околу 16:25 часот, а Јупитер и Сатурн ќе бидат на небото ниско на југозапад, па најдобро време за набљудување на овој феномен ќе биде од 16:30 до околу 18 часот, со оглед на тоа дека Јупитер и Сатурн заоѓаат околу 18:45 часот.
Гледано со голо око, овој феномен ќе изгледа скоро како да се споиле Јупитер и Сатурн, додека преку двоглед или телескоп, Јупитер и Сатурн ќе можат да се набудуваат во истото видно поле. Преку телескопот ќе биде можно да се видат четирите најголеми месечини на Јупитер, Јо, Европа, Ганимед и Калисто и најголемата месечина на Сатурн, Титан, во истото видно поле.