Невладините организации од Струмица до крајот на годината ќе реализираат 26 проекти со финансиска поддршка од Општината од локалниот економски развој и туризам, заштита на животната средина, култура и млади, социјална и детска заштита и од Програмата за еднакви можности меѓу жените и мажите.
Ова го соопшти градоначалникот Костадин Костадинов на денешната средба со претставници на здруженија на граѓани и фондации кои добија општинска финансиска поддршка за нивните проекти по распишаните Јавни повици.
- Најважно е дека сите доставени проекти од Здруженијата на граѓани и Фондации од општина Струмица за 2023 година во рамките на општинските стратешки определби и политики, а во интерес на граѓаните, ја добија нашата финсиска поддршка. Како што знаете, целата постапка беше јавна и транспарентна, со формирање на Комисија за спроведување на Јавните повици, која го изврши и изборот на проектните иницијативи, а ќе ја следи и реализацијата на проектите, рече Костадинов.
Додаде дека за оваа намена од буџетот на Општина Струмица се издвоени 5.577.871 денари, а најави дека во иднина оваа ставка ќе се зголемува.
Костадинов истакна дека е задоволен од големиот интерес на здруженијата на граѓани и фондациите од Општина Струмица и од нивните проектни иницијативи кои се мошне значајни и што е најважно се компатабилни со општинските стратешки документи и приоритети за 2023 година и избрани по усвоената ЛОТ Методологија.
