Која вакцина најдобро заштитува од делта сојот на коронавирус?
Делта сојот на коронавирус, кој потекнува од Индија и создаде хаос и ужасни човечки жртви во таа земја, се шири низ Европа, а достигна и до Македонија.
Новата варијанта на вирусот се шири околу 60 проценти побрзо од оригиналниот коронавирус, а колку страв предизвикува тоа најдобро говори фактот дека Јапонија прогласи вонредна состојба во Токио две недели пред Олимписките игри, поради ширењето на новиот сој во Јапонија.
Порталот Business Insider подготви преглед на сите студии кои ја проучуваат ефективноста на вакцините против новиот сој и излезе со неколку интересни податоци кои покажуваат дека глобалната слика не е црно-бела.
Британска студија: Pfizer 88% ефикасна, AstraZeneca 60%
Една британска студија од мај покажува дека вакцинираните со две дози Pfizer и AstraZeneca биле „високо заштитени“ од делта сојот две недели по приемот на втората доза. И AstraZeneca и Pfizer се ефикасни 33 проценти со само една доза.
Канадска студија објавена минатиот викенд вели дека две дози на вакцината се исто толку ефикасни против делта сојот, колку што биле и против алфа соевите (кои потекнуваат од Велика Британија). Сепак, оваа студија треба да се земе со резерва, бидејќи не помина стручна рецензија.
Според оваа студија, Pfizer е ефикасен 57 проценти по една доза, AstraZeneca е 67 проценти ефективна две недели по приемот на првата доза, додека Moderna е 72 проценти ефективна по првата доза. Немало доволно податоци за да се види колку биле ефикасни AstraZeneca и Moderna по двете дози, објаснуваат истражувачите.
Израелска студија: Pfizer ефикасна со 64% по две дози
Израелското Министерство за здравство во понеделникот објави дека вакцината Pfizer е малку послаба во заштитата од делта сојот отколку што беше претходно пријавено. Според тоа, Pfizer е 64 проценти ефикасна, според Израелците, по две дози.
Студија објавена во Шкотска и во престижното медицинско списание Lancet вели дека Pfizer обезбедува „многу добра“ заштита од делта, што е 79 проценти две недели по приемот на втората доза. Под истите услови, велат Шкотите, AstraZeneca штити 60 проценти.Зошто бројките варираат толку многу?
Business Insider објаснува дека процентот на ефикасност е односот на луѓето кои се целосно заштитени со оние кои не се – ако вакцината има 80 процентна ефикасност, 80 од 100 вакцинирани се целосно безбедни, 20 не се заштитени.
„Станува сè потешко да се измери колку вакцините навистина штитат затоа што стана невозможно да се контролира и следи кој е вакциниран, а кој не. Разлики има и во контролните групи, некои луѓе се повеќе склони кон ‘поризични’ ситуации, додека други се повнимателни да не се изложуваат на ситуации каде што може да има вирус“, се заклучува во сторијата на Business Insider.