Доделени Благодарници на правните и физички лица што донираа во гевгелиската болница

Директорот на Општата болница со проширена дејност Гевгелија, Митко Крџев, во присуство на градоначалникот Сашо Поцков, денес им додели Благодарници на дел од компаниите и поединците кои изминатиот период донираа финансиски средства, апаратура, прехрамбени и хигиенски средства на Општата болница со проширена дејност во Гевгелија. Заблагодарувајки се во име на сите вработени во Општата болница, во име на градоначалникот Поцков, и во свое име, директорот Крџев посочи дека донациите беа од непроценлива вредност во моментите кога Општата болница имаше насушна потреба од апаратура за борба против ковид пандемијата. Тој истакна дека фирмите и поединците од општините Гевгелија,Богданци и Дојран, уште еднаш ја покажале својата општествена одговорност кога тоа е најпотребно. Ние, рече Крџев, како здравствена институција, ги ставивме, и понатаму ќе ги ставаме, сите наши просторни и кадровски потенцијали, и со еден професионален и хуман пристап кон нашите пациенти, ќе продолжиме и понатаму во нивното излекување од оваа болест и што поуспешно справување со самата пандемија. Како што е познато, со последната хуманитарна акција што ја организираше фирмата „Жито Пром“ од Гевгелија заедно со повеќе фирми од Општина Гевгелија и од општините Богданци и Дојран, обезбедени се медицинска опрема и уреди во вредност од 25.000 евра за Општата болница и Центарот за јавно здравје-Гевгелија.Во хуманитарната акција учествуваа: „ЖИТО ПРОМ“, АМД „Дичо Панов“, „Конти Хидропласт“, „Џиви Доо”, ПЗУ „Дентиција”, „Итек Системи“, Здружение на возачи – Гевгелија, „Пет нет“, „Мем – Вочар“, Текстилна корпорација, „Штампа“, „Нар комерц“, „Дизел Ка-Ле“, „Марина Љупчо“, „Армор“, „Моделс Кокочев“, „Колвеко“, „Југостил“, „Дојран Стил“, Општина Богданци, Општина Дојран и ЈПКД „Комуналец“- Гевгелија. Исто така, од нив во минатите акции на Општина Гевгелија учествуваа и со донација на пакети со прехранбени продукти и хигиенски средства за семејствата од социјално-ранливите категории.