Уште една забава под маски за паметење се одржа синоќа во хотелот „Сириус“. Прекрасни креации, дружење и забава до раните утрински часови, така беше на традиционалниот маскенбал, кој уште еднаш потврди дека е одлична увертира на главната карневалска вечер. Жири комисијата имаше тешка задача, но сепак, одлучи и го избра брачниот пар Натка и Орце Спасови од карневалската група „Живи мртовци“ за принц и принцеза на Струмичкиот карневал кои ќе ја предводат главната карневалска интернационална поворка вечерва во 18,30 часот. Меѓу учесниците на маскенбалот беше и градоначалникот Коста Јаневски.
-Ова е прва година кога се појавувам во улога на градоначалник и покровител на струмичкиот карневал и морам да признаам дека чувствувам голема доза на возбуда. Ова е своевидна увертира во претстојниот карневал, очекувам дека ќе има добра забава и гостите ќе си поминат убаво и со нетрпение очекувам да ја ставам капата која што ја добив пред два дена од FEEC и карневалџиите и да влезам во волшебството на карневалската вечер, рече Јаневски.
